कस्तो अचम्म ! नवविवाहित जोडीलाई प्वाल परेको कण्डम वितरण गर्ने प्रस्ताव गरियो

जापानका एक प्रान्तीय राजनीतिज्ञले मुलुकको घट्दो जन्मदरको समस्या समाधान गर्न विवाहित जोडीलाई जानाजान प्वाल परेको कन्डम वितरण गर्ने प्रस्ताव राखी आफैँ समस्यामा परेको स्थानीय आमसञ्चारले शुक्रबार उल्लेख गरेका छन् ।

महानगरपालिका सभासदस्य तोमोनागा ओसादाले यस प्रकारको प्रस्ताव राखेपछि कडा चेतावनी प्राप्त गर्नुभएको छ र उहाँलाई यस विषयमा माफी माग्न बाध्य बनाइएको छ । उहाँको भनाइबाट क्रुद्ध भएका व्यक्तिहरूले उहाँलाई गाली गर्दै फोन गरेका छन् ।

ओसादाले आफूले निन्दनीय टिप्पणी नगरेको तर आफू यस विषयमा दुःखी भएको माइनिची सिम्बुनलाई बताउनुभयो । उहाँले उक्त टिप्पणी सभाको नियमित बैठकमा गत महिना गर्नुभएको हो । उहाँले नवविवाहितको यौनसम्पर्क क्षमता विस्तार गर्न उनीहरूलाई जापानी सखरखण्ड वितरण गर्नुपर्ने पनि बताउनुभएको थियो ।

उहाँले जापानी प्रसारण संस्था एनटीभीलाई आफ्नो नगरसभा राम्रो र मैत्रीपूर्ण स्थान होस् भनी यसप्रकारको टिप्पणी गरेको बताउनुभयो । उहाँले बालबालिका जन्माउन नसक्ने व्यक्तिको अपमान गर्ने वा उनीहरूको आलोचना गर्ने आफ्नो कुनै मनसाय नभएको बताउनुभयो ।

जापानमा जन्मदर विश्वकै सबैभन्दा कम भएका मुलुक सरह मानिन्छ र टोकियो हाल द्रूत रूपमा बढिरहेको प्रौढ व्यक्तिमा भएको सामाजिक सेवा खर्च कम गर्न प्रयासरत् छ । एएफपी